Na der bort vnses heren Cristi dusent jar veerhundert jar darna in dem achte vnde drittigesten jare des dingesdages vor sunte / Valentini daege do weren wij kerspellude van Gerdingen Katherinenherede, Tetenbul, Poppenbul vnde Osterheuer to Husem vor vnsem / gnedigen heren hertogen Alue to Slesswig hertogen greuen to Holsten vnde vor zinem rade den he dar mijd zik hadde vmme twidracht / de wij erbenompden vif kerspele to samende hadden vmme den dijck in der Osterheuer etcetera ♦

Vnde wij erbenompden vif kerspel brachten / dar sulves to Husem vor vnses erbenomeden gnedigen heren jegenwardicheit ver vnde twintichA zeker bedderue ludeA vresen vth / vnsen vif kerspelen alse bi namen Vedderke Tetensone, here Ouensone, Bo Atynghe, Sywel Peterssone, Herding Peterssone, Auch Zibens, Peter / Attensone, Backen BundiA, Broder Bonssone, Ade Menwerdessone, Broder Zigingh, Broder Ploghes, Bo Wennekensone, Tete Smyth, Jons / HemensoneA, Fedde Hanssen, Boye EekenssonA, Tyrt Alens, Saxe Wynnekens, Bo Eygingh, Diderick Bonssone, Luddelf Bonssone, Diderick / Luddersen, Tyrt HayensenA . ♦

Wes desse erbenompden xx iiij man in rechte edder in gudemA fruntliken sleteA twuschen vnsen vif kerspelen / vunden vnde vthspreken, dat wolde wij samptliken twuschen vns vruntliken to ewigen tiden holden . ♦

Vnde desse erbenompde xx iiij / wurden ouer enes vnde spreken af vor vnses erbenompden heren gnade in Hans Dunckes hus bynnen Husem desse schede . ♦

Tom ersten / alle dat vryeA land dat dar licht twuschen Hemmingh{oe}rne vnde der Merne twuschen Tetenbul koch unde Gardinge gheest / dat schal buten vaten in den Osterheuer dijk deymede deymet gelik . ♦

Item Ywarsbulling koch schal ok vaten buten / deymedes gelik . ♦

Item Klarenbullinge koch schal ok vaten deymedes gelijk buten an der Osterheuer dijk . ♦

Item Schockebul / koch dar schullet twehundert deymet landes helpen to Reynesbul koghe vnde alle dat andere land in dem koghe / na blifft schal ok mede buten vaten in der Osterheuer deymedes gelijk . ♦

Vortmer alle andere koghe schullen bliuen bi / erem egenen dyke . ♦

Item de Mernekoch wes dare ane is belegen in Euerkesschippes rechte, dat schal vaten in den / Wart koch . ♦

Item alle dat frie land, dat dar licht in dat zuden der ghest to Gerdingen, dat schal ok mede vaten in / den Wart koch . ♦

Vnde desse erbenomede vif kerspele willen bliuen bi erem egenen rechte vnde willen zik myd dem Holmer lande / efte myd Eyderstede nicht bekummern . ♦

Item vortmer so makede wij vif kerspele dar sulues to Husem vor vnsem gnedigen / leuen heren vorbenomet vnde zinem rade van dere twidracht wegene de wy to samende vnder vns hadden van desses / dykes wegene eyne gude ewige fruntliken zone myd allen den yennen de in der sake vordacht weren . ♦

Vnde dit alse / vorscreuen is hebbe wij vif kerspele vnser en myd dem anderen vnsem gnedigen leuen heren vorbenomet so gelouet / to holdende myd hande vnde myd munde . ♦

Des to tuge hebbe wy vnses landes Euerkeschip jngesegel myd den / jngesegelen vnser erbenompden vif kerspele Gerdingen, Tetenbul, Poppenbul, Katherinenherede vnde Osterheuer / samptliken vnde myd willen gehenget heten to dessem breue jn tid stede vnde stunde alse vorscreuen is . ♦