© 2024 Det Danske Sprog- og Litteraturselskab. Copyright
Dansk Litteratur drives af Hugo v0.119.0
Hosting: Det Danske Sprog- og Litteraturselskab
EODEM vesperi quo reversus sum domum, scripsi Μ. MACHABÆO, clarissime Domine Magister ANDREA, de equis, et tuas unâ illi misi literas, et effeci ut eadem nocte literæ transveherentur, ut summo mane sequentis diei Lundam venirent. Ego interea nihil ab eo responsi accepi, si tu aliquid, nescio. Equos si ab ipso non acceperis vide ut Haffniæ habeas, ego stabo promissis. Mitto tibi nunc literas ad Amicos in Germania, Norimbergæ ad CAMERARIUM, cui per te HOMELIJ Gnomonica remitto. Scripsi illi ut earum Bibliothecarum quæ in ipsorum urbe sunt, aliarumque memorabilium rerum tibi copiam faceret. Augustæ ad Consulem PAULUM HAINZELIUM et HIERONIMUM WOLFIUM, cui etiam tuos conatus commendavi, ut eos pro virili iuvarent. Scripsi etiam quasdam literas in ædes hospitis mei LAURENTII DEN et peto, ut si qua ratione fieri poterit, efficias ut Globum meum magnum, quem ipse conservat, ante hyemem habere possim; poteris si quos Augustæ emeris libros, ei includere et bene exterius interiusque compactum meo sumptu huc transferri curare. Norimbergæ etiam effice, ut certo ante hyemem ea quæ ad aquæductum meum requiruntur, a GEORGIO LAUBENWOLF Artifice, cui eo nomine prius per te scripsi, obtineam, et vide quid in Machina quam pro Rege parat, paratum sit, et urge opus tanquam id in mandatis a Rege et me haberes. Augustæ videbis et civitatis et civium instructissimas Bibliothecas, inprimis vero Fuggeranam idque per WOLFIUM consequi poteris. Cum Hospite meo LAURENTIO loquere an quicquam de Fratre meo CANUTO intellexerit, et utrum sciat ipsum Venetias ivisse, et an adhuc ibi commoretur, et si is tibi inciderit, vel de illo quicquam audiveris ubi sit, scribe illi meo nomine, ut sit bono animo: Regem esse placabilem et omnia in melius, quam adversarij putant, cessura. Sed hæc quæ de hoc scribo, in secreto coram omnibus et hîc et alibi habe. Si quos libros invenies in Germania, vel de Cometa præter eos, quos habeo, vel aliquid singulare in Astronomicis, mihi coëmas velim, ego pretium lubens restituam.