15971116001

1597. 16. november. Wandsburg

Tycho Brahe til Holger Rosenkrantz

A København, Rigsarkivet, Langebeks Diplomatarium. Afskrift

Tychonis Brahe Dani Opera Omnia, ed. I.L.E. Dreyer, Tom. VIII, Hauniæ 1925, p. 10

NOBILITATE NON TANTUM GENERIS, SED ET GENIJ ATQUE INGENIJ VIRO IN PRIMIS CONSPICUO DOMINO OLIGERO ROSÆKRANTZIO DE ROSENHOLM, CONSANGVINEO, AFFINI ET AMICO INTEGERRIMO.

S. P.

CORDATISSIME mi OLIGERE, cognate desideratissime et affinis exoptatissime. Postquam priores hisce .......................... viserint tandem an non potius sui ipsius, et patriæ, cuius honori studere merito debuissent, maiore incommodo quam meo ................ nostræ satis arguunt compositoris malevolum animum pari præiudicio et avaritiæ nefanda labe infectum:

Proh superi quid non mortalia pectora cogis

Sacra sitis Rosei fontis, præbendaque sacra!

Dolendum certe est, imo supra modum dolendum, iuvenem hunc Regem, alias suapte natura virtutis capacem et generoso animo præditum, talibus glaucomatistis ita occæcari et in devia deduci, ut id, quod verum rectumque sit et Regno ac sibi forsan maiore duratione honorificum, quam multa alia, quæ inutiliter fiunt et profunduntur, perspicere et sentire nequeat, utpote alienis oculis et auribus tam videns quam audiens. Veniet forsan tempus quando et oculatior, magisque auritus (experientia et usu rerum sic suadente) reddetur. At quantum ad me meaque tamdiu exantlata studia nimis sero. Præveniam potius, et mihi ............. favente divina providentia, dum adhuc tempus superest ........... iamque alea iacta est, numeratæ tesseræ re......Bene sit Regi precor, utut mihi præter culpam et iniuriam non faventi. Bene sit vobis omnibus .............. præsertim integrioribus. Bene sit universæ Daniæ ex animo opto.

.............. Deo tra.......... fortuna, sequamur. Iamque vale mi amantissime OLIGERE, et quæ hîc desiderantur, in prioribus atque postscriptis lege, TYCHONEMque ex asse tuum sincere redamare, quod et sponte facturus es, nunquam desiste.

Iterumque et sæpius vale.

Dabantur subito Wandesburgo prope Hamburgum, die 16. Novembris Anni 97.

Tuus intimus et extimus
TYCHO BRAHE,
manu propria.