16000417001

1600. 17. april n.s. Benatky

Tycho Brahe til Susanne Hájek

A Basel, Universitätsbibliothek Basel, Autographensammlung, Vol. 35, Fol. 106 f.. Kladde

Tychonis Brahe Dani Opera Omnia, ed. I.L.E. Dreyer, Tom. XIV, Hauniæ 1929, p. 198-99, no. 192

DER EDELEN VNDT VIELTHUGENDTSAMEN FRAWEN SUSANNEN HAIECKIN, GEBORNER MÖRLIN ETC. DESS HERRN D. THADDÆJ HAGÆCIJ EHLICHEN HAUSSFRAWEN, MEINER INNSONDERS GONSTIGEN VNDT BESONDERN FREUNDIN.

MEINEN freundtlichen gruß mitt wunschung alles guetten zuuor. Edele vndt vielthugendtsame fraw Susanna, ewer schreiben habe ich empfangen vndt daneben die brieffe, so Dauidt Heidlern, euern schuldenern, angehen, vndt bien willens als baldt gen Lübeck meinem factor aldo, einem vornehmen burger, deß nahmen euch itzunder bekandt, zueschreiben vndt vleissig zuuermahnen, daß er dazue thue alles, was ihm jmmer moglich sein kan, nach laut ewer vollmacht vndt ewern herren vndt euch dasselbe geldt einmahnen, vndt werdtt auß beyliegenden zettel zuesehen haben, mitt was worten ich solches vonn ihm begehren wil; wenn ich denn meinen bescheidt hieraus erlange, soll derselbe euch alsbaldt zuewissen gethan werden. Die fraw wolle aber so wohl thun, vndt mihr jhres herren doctoris Thaddæj zuestandt mitt furfallender gelegenheitt ferner wissen lassen. Der allmechtige guetige Gott verleihe ihm helf vndt beystandt, denselben ich euch auch inn seinen schütz vndt schirm trewlich thue befehlen.

Datum vff dem kayss. schloß Benatky den 17 aprilis anno 1600.