Dat si witlic al den luden. de dessen bref horet vnde set. also de boden sint komen van ouer she, van Lubeke her Marcwort van Kosfelde, van Gotlande her Wenemer van Essen, van des groten koninges weghene Philippe, van der Nougharden weghene Andre vnde Phylippe vnde Pawel vnde Ansen vnde Mikule Mesenick Felyce, vnde hebbet ghededinghet vor dem biscope van Tharbete, vor hern Hinrike van Plessecouwe van des mesteres weghene, vnde vor hern Woldemer van Dolen vnde vor hern Iohanne van Ixkulle, vnde vor hern Engelbrichte van Tysenhusen, vor hern Iohanne van deme Leuenwalde, vor hern Eylharde van Wranghele, vmme dat Wollus dot gheslaghen wart, vnde vmme sine kvmpane, de gheslagen worden in deme kogghen, vnde vmme Wolluses gut;..... ♦ Weret sake dat de Noughardere ein orloge kreghen mit deme koninge van Sweden oder mit des koninges mannen van Denemarcke, ofte mit den godesridderen, ofte mit deme stichte van Tharbete, ofte mit dem biscope van der Righe, ofte mit dem biscope van Osele, dar ne scal de Dudesche kopman nicht me th{ov} d{ov}nde hebben; ..... ♦ En tuginghe desser dinck so hebbet de vorbenomeden riddere vnde Woghen, en voghet des erliken heren van Tharbete, ere inghesegele vor dessen bref ghehangen. ♦ Desse is ghescreuen na godes bort dusent iar drehundert iar achtundritich iar, des sundages vor vnses heren himeluart.