Wie Gerhardt van gades gnaden hertoch tho Schleswigh graue tho Hollsten Stormarn vndt Schowenborgh bekennen vnd betiigen apenbar in dieszem breve dadt wie gedegedinget hebben mit dem ehrlicken herren dem dohmpraweste vnd dem capittull tho Schleszwich umb die articule de hier naschreven stahn in dieszer wise ♦ Thom ersten male dadt des capittuls lansten de scholen vnse dinge såcken vnd welckerley de se schuldigen will edder welckerley den se schuldigen willen vmb all sulcke weltlicke sacke de men mit geistliken rechte van rechtes wegen nicht richten schall dar mach men se midt dem landtrechte up den dingen vorvolgen alse in dem lande ein recht ist vndt deszglicken scholen der dohmherren lansten wedder dohn wen se tho schuldigende hebben ock up den dingen ♦ Averst wes der dohmherren lansten brecken vp den dingen dat sie 40 marck bröcke edder darentbauen edder darbenedden edder wes se anders verbrecken in de herschop dat schall de prawest vndt dat capittull upbören van ehren lansten vnd anders nemand ahne in halsz vndt handt dat schåle wie vnd vnse ambdlude richten men ehre gudt vndt geldt dat se in de herschop brecken dat schall fallen in dat capittull ♦ Weret ock dat den lansten der dohmherren neen recht geschehen konte up den dingen alse in dem lande ein recht ist aver wen se clagen alsze in dem lande ein recht isz so mogen de dohmherren ehre lansten tho rechte helpen mit geistlicken rechte ♦ Vortmer so schall nenerley den andern vor ienigen geistlicken rechte vorvolgen umb alle sulcke sacke de men mit geistlicken rechte van rechtes wegen nicht rechten schall men der dohmherren lansten ehrer ein den andern vnder <twischen> ♦ Auerst alle sacke de men van rechtes wegen mit geistlicken rechte richten magh dar scholen wie edder vnse amptlude de prælaten vnd dohmherren nicht an hinderen ♦ Des tho tuge hebben wie vnse ingesegell hengen laten <vor> diszen breff de geschreven isz tho Gottorff na gades gebort drutteinhundert in dem negen vndt negentigsten iare.