Eynfeldige befelunge vnd willigen dinst etcetera ♦ Allirdurchluchste forstynne E grosmechtige gnedige frauwe Euwir briefe vns lecczte gesant wir wirdiclich offgenomen vnd ouch dorynne euwir vorklerte meynunge wol habin vornomen vnd euwir durchluchte dirbytunge vns czu lybe gunst vnd fruntschafft wir vns begerlichin freuwen vnd getruwen euwir vnd vnsirs gnedigen herren euwirs sones allirdurchluchtikeit das wir mit dem ganczen vnsirm orden anders nicht vorscholden noch mit vorsacczt bewisen buessen redelichen notsachen wen das wir vns czu den vnd in den mit flieze enthalden wellen/ ♦ Vnd als euwir durchluchte gute berurte dy sache von Gotland vnd der stad Wysbu etcetera gnedige frauwe was doran geschen ist vnd do by vnsir selige gute meynunge wir hoffen das vns dy nymand vorkeren kan mit redelichkeit/ wenn euwir ryche frede selikeit vnd wolfaren doczu vnsirs ordens lande nicht alleyne sunder des gemeynen kowfmans sichirheit vnd beschirmunge vswysen das vnsir meynunge von an begyn/ vnd noch hutes tages gut ist/ ♦ Vortme allirdurchluchste gnedige frauwe als euwir grosmechtikeit begerende ist vnsir bothen czwisschen ostern euwir wysheit czu vnderwysen vnsir meynunge/ so geruche euwir durchluchtikeit czu wissen das wir vnsir bothen so wir erste mogen gerne vsrichten wellen wenn is e. nicht wol gescheen kan dorumb wenn wir vnsir gebitiger dy itczunt in der reyse synt uff dy heidenschafft nicht woll habin konnen der willen vnd wissen wir doczu bedorfen ♦ Ouch so muesse wir vor vnderricht werden von vnsirm sachwalden off dy antwert euwirs briefes wenn sunder in vns nicht moglich ist mit eren eine antwert czu gebin euwir grosmechtikeit wenn wir yo von synentwegen czu getruwer handt das selbige land vnd stad innehalden/ vnd do dy vnsirn das landt vnd stad vorgenant ynnomen mit grosser koste vnd czerunge musten das vorbrifen als der brif vswiset/ ♦ Dorum so hoffe wir groslich czu euwir vnd vnsirs gnedigen herren euwirs sones allirdurchluchtikeit das ir vns eynen semlichin offeczog noch eynen lengern nicht vorkeret/ vnd se vns euwir grosmechtige durchluchtikeit gonst lybe vnd fruntschaft so myldiclich anbuet vngerne von vns nemen geruchet wen das vns mogelich vnd erlich ist czu thun ♦ Gnedige frauwe gebytt an vns vnd dy vnsirn als an euwir andechtige bether czu gote vnsirm herren ♦ Gegeben czum Sthume an der mittwoche noch Scolastice uirginis im xiiii^o iare.